Tuesday, January 17, 2023

मामु आखिर तिमी आयौ

मामु आखिर तिमी आयौ

तर किन यति ढिला गरेर आयौ,

जब  ताते ताते गर्दै

लड्दै लड्दै हिंड्न खोज्थें

तिम्रो त्यो न्यानो अँगालो

कति खोजीरहन्थें 

तर तिमी  केवल

मन्द आवाजमा गुञ्जीदिने गर्थ्यौ,

जब  तोते बोलीमा

तिम्रो नाम पुकार्ने गर्थें

लाग्थ्यो कतैबाट अनायसै

तिमी मुस्कुराउँदै आउनेछौ

तर तिमी  काल्पनिक पर्दाबाटै

मलाई बस् चियाईरहन्थ्यौ,

माया गर्दै तिमीलाई

तिम्रै साथमा रमाउँ भन्थें

तिम्रो हातले खुवाएको

बुबु माम खाउँ भन्थें

तर त्यो दिन कहिल्यै आएन

अहँ आउँदै आएन,

कालो आकाशतिर नियाल्दै

  तिम्रै बाटो हेरीरहन्थें

हजारौं पराईहरुको भीडमा

 तिमीलाई नै खोजीरहन्थें

 कसैलाई बुझाउन सक्थें

 कसैले बुझ्न नै सक्थ्यो

तिम्रो मायालु साथ नपाउँदा

 कति तड्पिई रहन्थें

टिलपील टिलपील आँसु बनाई

 कति भक्कानिई रहन्थें,

अब फेरी मलाई छाडी

टाढा नगईदेउ है मामु

हात समाई टुकु टुकु

सँगै लगीदेउ है मामु 

No comments: